ROXAS CITY — Ginsaysay eksklusibo sa Bombo Radyo Roxas sang babaye nga nagabaligya sang retailer simcard kun paano niya nakatransaksyon ang mga persona nga ginapatihan responsable sa pag-abduct sa iya kag nagtago sa iya sang kapin duha ka adlaw sa Mindoro.
Suno kay Karen Besa, 32-anyos, residente sang Barangay Libas sining siyudad, nagtawag sa iya ang isa ka babaye nga nagpakilala taga banwa sang Dao agud magbakal sang apat ka mga retailer sim nga balor P499 kada isa.
Suno kay Besa, nagkasugot sila sang babaye nga magtabuay sa banwa sang Mambusao sang Sabado agud didto idul-ong ang items.
Sang makaabot sa Mambusao si Besa, gilayon man siya nga ginsugata sang iya katransaksyon nga babaye kag didto hinali na lamang siya suno sa iya nga nadulaan sang pangalibutan.
Natandaan na lamang niya nga ginbaton niya ang gindaho sang babaye nga isa ka plastic sang softdrinks nga iya gin-inum kag may pula nga van sa ila nga luyo nga ginapatihan amo ang ginasakyan sang iya katransaksyon.
Apang sa kun ano ang natabo sa iya sa sulod sang kapin duha ka adlaw, wala na sang matandaan pa si Besa.
Nagbalik na lamang liwat ang pangalibutan sang biktima sang nagasakay na siya sa barko gikan sa Mindoro.
Suno kay Besa, ginpukaw na lamang siya sang iya kaluyo bangud manugdungka na ang barko sa Caticlan Port sa Aklan.
Wala gid sang may nadumduman si Besa sa iya pagbugtaw apang natalupangdan niya nga may nakasulat nga duha ka mga cellphone numbers sa iya palad.
Ginhingyo niya ang kaluyo nga matawagan ini kag didto nahibaluan nga numero gali adto sang iya manghod nga babaye.
Nakabatyag man siya sang pagpalaminhod sang iya kalawasan kag iya natalupangdan nga na-ilisan na ang iya suksok sadto nga blouse sang T-shirt nga suno sa iya, indi man iya.
Indi man matumod ni Besa kun ano ang motibo sang mga persona nga nagkuha sa iya sa banwa sang Mambusao kag nagdala sa iya sa probinsiya sang Mindoro.
Nahibaluan nga mismo ang mga pulis naman sa Caticlan Port ang nagsugat sa iya sa ibabaw sang barko kag gindala sa ila istasyon kun sa diin matapos nga ginpainum siya sang tubig, didto na lamang kag kasubong nga nagbalik na ang iya husto nga pangalibutan.
Samtang natukiban man nga wala na ang dala nga cellphone ni Besa kag sang gintsekyar ang iya account sa ATM, P600 na lamang ang nabilin sa nakadeposito nga masobra P5,000.
Nahibaluan nga kapin apat ka bulan pa lamang sa siyudad sang Roxas si Besa bangud didto na sila nagapuyo sang iya bana sa Metro Manila, kag tunga sa tuig na siya nga naganegosyo sa online sang retailer sim.
Nahibaluan man nga nagabutho pa si Besa sa isa ka culinary school sa siyudad sumugod nga ini ang nagpauli sa Barangay Libas.
