Nakaangkon sang tumalagsahon nga reklamo ang Serangoon North Neighbourhood Police Post sa Singapore sang nagpadulong ang isa ka babayi nga nagpakilala “Carol” bangud sa kalain sini sang buot sa isa ka food stall.
Suno sa iya, natabo ang insidente sang Enero 13 sang nagbakal ini sang prawn dumpling noodles apang pag-abot sini sa iya balay, natingala ini sang makita nga chicken feet ang sulod imbes nga dumplings, gani nagbalik siya dayon sa food stall agud pabayluhan ini.
Gin-athag niya sa tindero paagi sa kumpas sang iya kamot nga indi paghimuon sang makahang ang iya order apang ginkuha sang tindero ang pagkaon kag ginlampos sa lamesa nga ginkakibot sini.
Mas nagdugang pa gid ang kaingit sang ulo ni Carol sang nakapauli siya kag nadiskubre nga daw ginhungod pa gid nga butangan sang sili ang iya pagkaon bisan pa sa pabalik-balik sini nga pahanumdom.
Tungod sa kaingit niya bangud indi manami nga serbisyo, nagsakay pa ini sang bus pabalik sa food stall agud atubangon ang tindero, pero ulihi na ang tanan bangud kay sarado na ang stall.
Tungod kay wala siya nakabalos ukon makareklamo personal, nagdesisyon na lang ini nga magdiretso sa presinto agud magpa-blotter.
Ginpanindugan niya nga tama ang iya bayad gani indi angay nga pagkalainon ang pagtrato sa iya, kag nagsumpa siya nga indi na siya magbakal liwat sa amo nga baligyaan.
Apang ang sala nga order, makahang nga pagkaon, ukon may attitude nga tindero ang ginakonsidera nga civil disputes kag indi krimen.
Gani gin-advisan siya sang mga otoridad nga dal-on ang reklamo sa Consumers Association ukon istoryahon ang tag-iya sang tindahan, bangud wala sang basehan para sa criminal case ang sala nga order sa pagkaon.
