ROXAS CITY – Dakop ang 35-anyos nga babayi nga ginapahayag miyembro sang terorista nga grupo nga NPA matapos ginserbehan sang mandamiento de aresto sang gintingob nga pwersa sang Pontevedra PNP, CPMFC, CIDG kag PDEA Capiz sa Barangay Lantagan banwa sang Pontevedra subong nga adlaw.
Sa inisyal nga impormasyon, ginkilala ang naaresto kay Carina Abuyan Oliveros alias “Carina Jovelyn Oliveros”, may bana kag kabataan kag residente sang nasambit nga Barangay.
Sa interview sang Bombo Radyo kay Barangay Kagawad Dodong Values sang Barangay Lantagan, ginsiling sini nga tumandok ang bana ni Abuyan sa ila lugar samtang si Abuyan naman ang taga-Zambales apang masobra naman ini sila 10 ka tuig nga nagapuyo sa ila barangay.
Ginkakibot pa suno diri sang kagawad sang ginkadtuan siya sang otoridad kag nahibaluan nga si Abuyan ang subject bangud wala sini namutikan ukon nakit-an nga may kaupod nga mga makatilingala nga grupo ang naaresto.
Suno kay Values, pigado ang pangabuhi ni Abuyan kag masami nakaupod man nila ini sa pagdul-ong sang kabataan sa buluthoan si Abuyan.
Ginpahayag sini nga ba-se sa nangin pahayag ni Abuyan sa kapulisan, naga-upod ini sa training agud magpangbulong.
Panawagan ni Kagawad sa iya kabarangay nga magsungka kun may koneksyon sa terorista nga grupo ukon magbalik nalang sa gobyerno.
Sa karon yara sa pag-inakop sang Pontevedra MPS ang naaresto kag natalana nga igahunong sa CIDG-Capiz buwas nga adlaw.
