Isa ka pamilya sa Kidapawan City ang nakabaton sang ila Balikbayan boxes halin sa Kuwait suno sa Department of Migrant Workers (DMW).
Nahibaluan nga naglawig sang tatlo ka tuig antes mabaton ni Alma Rios ang mga packages nga sa ila pagdumdom nadula, apang ginkumpirmar ni Migrant Secretary Hans Leo Cacdac nga ang mga kahon, upod ang kaanggid nga mga packages para sa duha pa ka pamilya ang gindul-ong sa pamilya.
Gin-athag sang Bureau of Customs (BOC) nga naatrasar ang mga kahon bangud sa miscommunication sa tunga sang freight forwarder sa luwas sang pungsod kag sang local courier, lakip na ang pagpangdaya sang pila ka mga kumpaniya.
Bangud sini suno sa iya, nagpatigayon sila sang libre nga delivery sang mga balikbayan boxes nga ginbayaan sa mga bodega sa Bulacan.
Ang madinalag-on nga turnover resulta sang koordinasyon sa tunga sang DMW, Bureau of Customs (BOC), kag iban pa nga ahensya sang gobyerno, kasunod sang pagpirma sang Joint Administrative Order kag Deed of Donation.
Sang Mayo subong nga tuig, halos 3,000 ka mga balikbayan boxes nga ginbayaan sang mga freight forwarders ang ginsaylo sa DMW para ipanagtag sa mga pamilya nga OFW.
Bilang sabat, ang DMW nagbutang sang polisiya upod sa BOC kag iban pa nga mga ahensya agud masiguro ang matalunsay, madasig, kag luwas nga pagdul-ong sang mga balikbayan boxes.
