ROXAS CITY – Nakilala na ang bangkay sang lalaki nga yara sa advanced state of decomposition sa suba sang Sitio Pangpang, Barangay Tabuc, Pontevedra, Capiz.
Na-identify pinaagi sa ID’s kag wallet nga nasulod sa beltbag ang biktima nga si Joey Biclar 52-anyos sang Barangay Talasa, Panay.
Ginpahayag ni Gerald Biclar, utod sang biktima nga wala sila nagdumdum nga ang ginareport sa Bombo Radyo nga nakita nga bangkay amo na ang iya utod nga wala nakapauli sang Pebrero 29, 2020.
Suno kay Gerald nga katapusan nila nga pagkit-anay sang biktima sang nagligad nga Sabado sang nagpadulong ini sa ila balay matapos nagkadto sa punong para magkuha sang sweldo.
Nag-inum pa sila antes nagpauli ang utod, apang pagka Domingo nga adlaw nahibaluan sini nga wala nakapauli ang biktima.
Apang nagdumdum ang pamilya sang biktima nga may ginkadtuan lamang ini.
Nahibaluan nga nagsakay pa sa baroto so Joey apang posible nga nadanlog kag nalumos.
Nakita na lamang sa baroto ang pila ka mga pagkabutang sang biktima kasubong sang cellphonem charger kag shades.
