ROXAS CITY – Nahaya na sa ila nga puluy-an sa Barangay Milibili, Roxas City ang bangkay sang 31-anyos nga si 2nd Lieutenant Jennett Aguilar, isa ka military nurse nga assigned sa Armed Forces of the Philippines Hospital- V Luna.
Suno sa iya amay nga si retired Colonel Bennett Aguilar, nag abot kaina sang aga ang bangkay sang iya nga bata sa Roxas City airport.
Sa karun wala pa sang plano kun san-o igatunod ang bangkay ni Aguilar bangud pagahinalaan pa sang mga ini, apang diri ini igahaya sa ila nga puluy-an sa Barangay Milibili.
Samtang, sa pihak sang pagpangayo sang pasaylo sang suspetsado nga si John Louie Brosas, 19-anyos sang Barangay Comembo, Makati, nga nag buno-patay sa biktima, wala makita ni Col. Aguilar ang sinseridad sa iya nga pagpangayo sang pasaylo.
Desidido sa karun ang pamilya nga madunot sa presuhan si Brosas kag bayaran ang ginbuhat sini nga krimen.
Matandaan nga ginbuno sang makaduha ka beses sa dughan sang suspek si 2nd Lt. Aguilar matapos nga gin-agaw sini ang cellphone sang biktima samtang nagabantay ini sang salakyan agud mag duty alas dos sang kaaganhon sang tinalikdan nga Nobyembre 14.
Nahibaluan man dugang nga ginahatagan pa sang pagkaon kag kwarta sang biktima ang suspetsado sa tagsa ka may ginapabuhat ini sa ila nga puluy-an bangud magkakilala ang duha kag naga trabaho man bilang construction worker malapit sa balay sang ginpatay nga si Aguilar si Brosas.
