ROXAS CITY – Wala sa gihapon matumod ang bangkay sang isa ka persona nga nasapwan sa kakugnan sa Barangay Libas, Roxas City alas 10:00 sang aga kahapon nga adlaw.
Sa interview sang Bombo Radyo kay Punong Barangay Richard Arrojado, suno diri wala may nagparekord sa amo nga barangay nga nadula nga persona kag tubtob sa karon wala pa sang may naga-claim nga himata sang biktima.
Dugang pa sini nga kun may matabo man nga report sang missing person sa ila talatapan maga-asister gid ang opisyales sang barangay kag magabulig patigayon sang pagpangita.
Ginpahayag ni Arrojado nga ang nasambitan nga lugar kun sa diin nasapwan ang bangkay amu ang ginpatigayunan sang bulang duwa na ka bulan kun sa din gin-raid ini sang mga kapulisan.
Ginakonsiderar man sini ang posibilad nga ang biktima, isa sa mga manugbulang ukon manugtaya kag posible nga nagdalagan ini sa tion sang pag-raid sa area kag didto gin-atake sang hapo.
Sa karon, ginahulat pa ang resulta sang autopsy examination sang Scene of the Crime Operations (SOCO) agud mahibaluan ang gintunaan sang kamatayon sini.
