PANAY, CAPIZ – May yara sang maathag nga mandu si Panay, Capiz Mayor Jonathan “Sonny” Besa sa bantay dagat sang banwa nga magpatrolya sa kadagatan agud madakpan ang iligal nga mga nagapangisda.
Ini kasunod sang serye sang illegal fishing nga nadakpan sa kadagatan nga sakop sang nasambit nga banwa.
Sa interview sang Bombo Radyo kay Mayor Besa, iya ginpahayag nga ang pagpatrolya sang bantay dagat amo agud nga makontrol ang iligal nga pagpangisda agud maproteheran ang magagmay nga manugpangisda.
Suno kay Besa, nagapakig-angot man ang local government sa Philippine Coast Guard kag sa Philippine National Police Maritime Group agud makapangayo sang assistance sa pagpatrolya bangud malapad ang sakop sang municipal waters.
Dugang pa sang alkalde, wala gid sang mangin problema sa mga nagapangisda kun may mga permit ang mga ini kag ginapaagi sa legal ang pagpangisda.
