DUMARAO, CAPIZ- Pormal nga ginbaton sang alkalde sang banwa sang Dumarao, Capiz ang Certificate of Recognition nagikan sa Department of the Interior and Local Government (DILG) bilang pagkilala sa mabakod nga panindugan kag aktibo nga partisipasyon sang Lokal nga Gobyerno sang Dumarao sa pagpatigayon sang mga maayo nga pag-ginobyerno.
Sa interview sang Bombo Radyo kay Mayor Atty. Matt Hachuela, sang nasambit nga banwa, iya ginpahayag nga ang pasidungog ang kaangut sang pagpaidalom sang Dumarao bilang Pioneer Local Government Unit (LGU) sa pagpatuman sang Philippine Agenda for Localization of the Open Government Partnership (OGP).
Ginhatag ang sertipiko sa isa ka seremonya nga ginpatigayon sa Iloilo City, nga gintambongan sang mga tiglawas sang DILG.
Suno kay Hachuela, kaupod niya sanday DILG Capiz Director Cherryl Tacda kag Municipal Local Government Operations Officer (MLGOO) VI nga si Ponz Alvero, nga lunsya nagpahayag sang suporta kag pagkilala sa mga inisyatiba sang local government.
Pahayag niya, ginsiling sang DILG nga ginkilala ang Dumarao bangud sa mga tikang sini padulong sa mas bukas, tampad, kag participatory nga gobyerno, kun sa diin aktibo nga ginadala ang mga pumuluyo sa mga proseso sang pagdesisyon.
Magluwas sini, hugot nga ginsiling sang DILG nag ang Dumarao ang nagaisahanon nga munisipalidad sa probinsya sang Capiz na ginhatagan sang nasambit nga sertipiko, pamatuod sang pagpaninguha kag dedikasyon sang lokal nga gobyerno.
Nagpasalamat naman si Mayor Hachuela sa pagkilala nga nabaton kag ginsiling nga magaserbe ini nga inspirasyon agud nga mas pasangkaron pa ang mga programa kag serbisyo nga nagadumala sang transparency, accountability, kag maayo nga pagginobyerno para sa mga pumuluyo sang Dumarao.
Interviewed by Bombo Sunnie Mae Constantino Batencila
