ROXAS CITY – Nagabara nga basura sa drainage system ang rason sang pagbinaha sa National Housing Unit sa Barangay Rizal, Pontevedra, Capiz.
Ini ang ginkompirmar ni Dominica San Diego ang District Manager sang National Housing Authority (NHA) sang mainterview sang Bombo Radyo.
Suno kay San Diego nga nagtawag ini gilayon sa contractor sang amo nga housing unit matapos nga nakalab-ot sa iya ang reklamo sang pila ka mga residente nga pagbaha sa ila lugar.
Apang, ginpahayag sang mga contractor nga ginkay-o na nila ang drainage system apang nagbara naman ini bangud sa mga basura nga ginahaboy sang mga residente rason nga nagaresulta sang pagbaha.
Bangud diri, ginpakamaayo na lamang ni San Diego nga ipalab-ot sa lokal nga gobyerno agud masolusyonan ang madugay na nga problema sang mga residente.
Matandaan nga madamo nga mga residente ang nagpalab-ot sang ila reklamo pinaagi sa segment sang Bombo Radyo nga “Ipa-BOMBO ta, Ipa-BOMBO naton’ ang masami nga pagbaha sa ila lugar sa tagsa ka magbubo ang mabaskog nga ulan kun sa diin nagalab-ot pa sa hawak ang tubig baha.
