ROXAS CITY – Liwat nga naeksperyensiyahan sang mga opisyales sang Barangay Inzo, syudad sang Roxas ang ila nangin problema nga nautdan sang suplay sang kuryente kag tubig ang ila Barangay Hall.
Ini ang ginkumpirmar ni Kgwd. Rommel Balguma, sang mainterview sang Bombo Radyo.
Suno diri, nga wala nabayaran ang electric bill sang Nobyembre kag Disyembre 2021, mga tinion nga nagbalik si Punong Barangay Einstein Okpura matapos ini nga na-suspend.
Pahayag ni Balguma nga sa pagbalik ni Okpura, luyag sini nga ibalik ang nahamut-an niya nga Brgy. Treasurer nga si Regina Olivare, apang bangud ginpasakaan ni Okpura sang kaso ang 6 ka mga Brgy. Kagawad sini, nagkasugot ang ila konseho pinaagi sa resolusyon nga sa bulan sang Nobyembre kag Disyembre, si Nelson Aquines ang papungkuon bilang ila Brgy. Treasurer, samtang Pebrero tubtob Abril, 2022 naman magapungko si Olivare.
Bangud wala nagpasugot si Kapitan, wala sang nagpungko nga Brgy. Treasurer sa ila Brgy. Hall, rason nga wala sang may nagproseso sang ila mga finances, kalakip na ang honoraria sang mga opisyales.
Panawagan sang mga Kagawad nga kuntani matandog ang ila Punong Barangay sa ila sitwasyon bangud apektado man diri ang mga pumuluyo nga nagaproseso sang dokumento.
Sa pihak nga bahin, ginsiling man ni Punong Barangay Okpura nga bahala na ang pumuluyo nga magdesisyon sa nagakahinabo sa ila Barangay bangud suno diri nga plano na sang pila sini ka mga Kgwd. nga piangon ang ila Brgy. Hall kag ang iya sini nga pagserbisyo agud nga magguwa nga ini ang malain.
Apang, padayon ini nga magaserbisyo suno diri sa kutob sini masarangan.
