CUARTERO, CAPIZ – Gin-aresto sang kapulisan ang isa ka Barangay Official matapos nga nagpinalupok ini sang armas-luthang sadtong Abril 12 sang gab-i sa Sitio Dumalagan, Brgy. Carataya, Cuartero, Capiz.
Ginkilala ang arestado nga si alyas Tom, 46-anyos nga isa ka Barangay Kagawad sa amu nga lugar.
Sandig sa impormasyon nga nagikan sa Cuartero Municipal Police Station, samtang nagapatigayon sila sang police visibility sa sulod sang binaylehan sa Sitio Dumalagan sa nasambit nga Barangay, sang hinali lang nga gingabot kag gin-alsa ni Barangay Kagawad Tom ang iya armas-luthang kag nagpinalupok sang makapila ka beses.
Gilayon nga gin-aresto sang kapulisan ang amu nga barangay official kag nakuha sa posisyon sini ang isa ka yunit sang caliber .45 pistol kag narekober man sa lugar ang apat (4) ka basiyo sang bala.
Nahibaluan sa imbestigasyon sang kapulisan nga naakig suno diri ang amu nga Barangay Kagawad bangud nga wala malawag ang iya pangalan sa isa ka special dance number.
Ginlapas sang amu nga opisyal sang Barangay ang Republic Act 10591 ukon Comprehensive Firearms and Ammunition Regulation Act bangud wala ini sang may ginpresentar nga nagakaigo nga dokumento sa iya armas kag Comelec Resolution no. 10918 in relation to Batas Pambansa Bilang 881.
