ROXAS CITY– Nakaluwas sa ambush ang kapitan sang Barangay Agdahon, Cuartero, Capiz kaupod ang duha ka mga kaupdanan.
Nahinabo ang insedente samtang nagapauli na sanday barangay captain elect Francisco Degara Sr., Daniel Umargas kag Jomer Bustamante gikan sa ila nga pag-inum.
Hinali na lamang nga nakabati sang asod asod nga lupok sang armas ang tatlo rason nga gilayon sila nga naghapa para indi maigo sang mga bla.
Sa interview sang Bombo Radyo Roxas kay punong barangay Degara Sr., ginpahayag sini nga lima ang mga suspek bangud sa mga lupok sang armas nga gikan sa magkatuhay nga area nga malapit lamang sa ila nga ginaagyan.
Gin-ako man sa Bombo Radyo ni Kapitan Degara nga pulitika ang ugat sang pag-ambush sa iya, bangud antes ang insedente madamo na ini sang nabaton nga death threat sa diin ginpahog ini nga ubuson ang iya pamilya kun magpadayon siya sa iya nga pagpapili.
Nahibaluan nga ini na ang ikaduha nga tion nga gin-ambush ang nasambit nga barangay kapitan, sa diin nahinabo ang una nga pag-ambush sang bulan sang Disyembre sa diin napatay ang iya anak nga si Francisco Degara Jr.
