ROXAS CITY – Dako ang mangin kontribusyon sang mga Barangay Tanod sang tagsa ka ka-barangayan agud mapabilin ang kalinong kag katawhay sang syudad.
Ini ang ginpahayag ni Gino Salamanca, Head of DILG Roxas City, sang mainterview sang Bombo Radyo.
Ginsiling ni Salamanca, nagpatigayon na sila sang pagsinapol nga ginakalakipan sang City Government, SP Chairperson Committee on Peace and Order and Police Matter, Roxas City PNP amu man ang 47 ka mga Chief Tanod sang tagsa ka barangay kag gindiskusyunan ang pagpasangkad sang peace and order ilabi na sa pagtapna sang krimen.
Dugang sini, ang barangay officials’ ang may daku nga resposibilidad sa ila komunidad kag ang kapulisan naman ang maga-umento sa pagresponde kun may ireport nga insidente.
Ginpabugal ni Salamanca, nga may yara sang pagahiwaton nga “Tanod Training” sa Hulyo kun sa diin tudluan kag hanason ang mga Tanod kun paano ang insakto nga pag-aresto sa mga may malain nga tinutuyo kag paga-pangunahan ini sang Chief Tanod sang Brgy. VI nga amu ang trainor sa taekwondo kag arnis.
Ginpalab-ot naman sang mga tanod nga kuntani tagaan sila sang philhealth kag insurance bangud sila ang frontliners kag una nga nagaresponde antes ang kapulisan.
Ginsiguro man sang opisyal nga pagatagaan nila sang pagtamud kun ano ang kinahanglanon sang mga ini.
Panugyan sini sa pumuluyo ilabi na sa mga negosyante nga kun may sobra, mahimo nga maghatag ukon magbulig sa mga Tanod bangud ang mga ini ang wala man sang may ginabaton nga sweldo.
