ROXAS CITY – Madugay ang nangin monitoring sang PDEA Capiz sa ginapahayag drug den kag tag-iya sini sa bahin sang Railway St. Barangay Punta Tabuc sining syudad.
Matandaan ginkasahan sang drug buy bust operation ang 10 tanan ka mga persona kalakip si Ruel Espiritu Valencia, 53-anyos, target person, tag-iya sang drug den kag isa ka Barangay Tanod sa nasambit nga barangay.
Samtang ang 9 amu sanday Frederick Besa Dellota, 25-anyos, residente sang Poblacion Ilaya, Panitan, Gil Severo Ojera, 52-anyos, Fernando Laureano Ojera, 61-anyos, Joel Limboy Baso, 44-anyos lunsay residente sang Brgy. San Jose, Roxas City, Nicole Aldea Villanueva, 19-anyos, residente sang Inzo Arnaldo, Roxas City, Jason Barbasa Datiles, 45-anyos, residente sang Brgy. Banica, Roxas City, Ramie Develos Fuentes, 28-anyos kag residente sang Pob. Ilawod banwa sang Panitan, 15-anyos nga lalaki, Jolly Altamia Delos Reyes, 56-anyos, residente sang Brgy. Punta Tabuc.
Sa interview sang Bombo Radyo kay IA1 Gelly Robins Cataluna, Provincial Director sang PDEA Capiz, ginpahayag sini nga nagpatigayon na sila sang buy bust operation sa kaluyo nga balay ni Valencia sadto kag didto ginpaandaman nila si Valencia nga mag-untat ini kun nagaduso man sang iligal nga droga.
Dugang naman ni Barangay Kapitan Nestor Buenviaje sang Punta Tabuc nga anay drug surrenderee ang nasambit nga Brgy.Tanod kag nagpromisa sa iya nga maga-untat na.
Apang, bangud sa pila ka pumuluyo malapit sa drug den ang nagreklamo bangud sa guwa sulod ang mga estranghero sa dis oras sang gab-i rason nga ginbantayan ini sang PDEA.
Ginsiling man ni Kapitan Buenviaje nga iya ini nakumpirmar matapos nag-roving sila kagab-i kag nasugata sa lugar ang tatlo ka persona nga indi residente sang ila barangay.
Dako naman ang pagpasalamat ni Cataluna sa pumuluyo nga nagakooperar kag nagahatag impormasyon sa otoridad.
Mensahe sini sa mga nagaduso sang iligal nga droga nga magsungka kag magpaidalom sa programa sang gobyerno nga magabulig sa ila pagbag-o.
