BOMBO ROXAS – Nagpasalig si Vice Governor Jaime Magbanua kag ang bug-os nga Board Members sang Sangguniang Panlalawigan nga pagabuligan ang pamilya sang siyam (9) nga napatay kag napulo (10) ka mga naaresto matapos ang madinuguon nga implementasyon sang Search Warrant sa pito (7) ka mga kabarangayan nga sakop sang banwa sang Tapaz, Capiz sang nagligad nga Disyembre 30, 2020.
Suno kay Ms. Darlene B. Surriga, tagpamaba sang Bagong Alyansang Makabayan – Capiz nga kaupod ang mga tumandok sang nasambit nga banwa, personal sila nga nagpadulong sa kapitolyo probinsyal agud ma-diskusyonan kun ano ang mapaabot nga bulig sang probinsya apisar nga nauna na nila ini nga ginpalab-ot kay Capiz Governor Esteban Evan Nonoy Contreras.
Suno kay Surriga nga ginasinggitan gihapon sang pamilya sang mga biktima ang matuod-tuod nga hustisya sa indi makatawo nga natabo nga operasyon sang mga kapulisan kaupod ang militar.
Ginakabig ni Surriga nga isa ka massacre ang natabo kag indi ordinaryo nga operasyon rason nga ginaapelar man gihapon sini nga maghalin ang presensya sang mga militar sa mga kabarangayan sang nasambit nga banwa.
