Nagapanawagan ang BAYAN Panay sa gobyerno i-suspend ang excise tax kag Oil Deregulation Law agud macontrol ang sobra nga pagsaka sang presyo sang produktong petrolyo.
Sa interview sang Bombo Radyo, kay Elmer Forro, Secretary General sang BAYAN Panay, iya ginpahayag nga dapat maghimo sang tikang ang gobyerno agud mapahagan-hagan ang pagsaka sa presyo sang gatong.
Suno sa iya, kon magpadayon ang sitwasyon, indi lang ang ang motorista ang mabudlayan kundi pati man ang bug-os nga pumuluyo sa pungsod.
Dugang pa ni Forro, kun indi maghulag ang gobyerno, mahimo nga mas dako pa ang mangin epekto sa presyo sang mga balaklon kag serbisyo sa bug-os nga pungsod.
Ginhatagan man niya sang pagtamod nga importante nga mahatagan sang bulig ang mga pigado nga pamilya nga tuman nga naapektuhan sang pagsaka sang presyo sang gasolina kag krudo.
Pahayag pa niya nga kinahanglan man nga i-monitor sang gobyerno ang mga presyohanay sang local kag i-account ang mga stock sang mga gasoline stations agud indi magpinagusto nga magpasaka sang presyo.
Samtang ginabantayan ang bigtime oil price subong nga semana bangud man sa nagapadayon nga tensyon sa Middle East.
