ROXAS CITY, CAPIZ- Wala sang may narekord nga insidente sang sunog ang talatapan sang Bureau of Fire Protection (BFP) Roxas City, kadungan sang pagsug-alaw sang Tigkalalag 2025.
Sa interview sang Bombo Radyo kay Senior Fire Officer 1 Junemar Galve, Public Chief Information Officer sang Bureau of Fire Protection Roxas City, iya ginpahayag nga nagapasalamat gid ang ila nga talatapan nga wala sang sunog nga nagluntad sa syudad sang Nobyembre 1 ukon All Saints’ Day.
Suno kay Galve, hugot ang ila nga pagbantay kag monitor sa bilog nga syudad may kaangtanan sa ila nga responsibilidad sa sunog.
Pahayag nya, apisar nga yara sila sa mga patyo sa syudad, nagapabilin ini sila nga alerto para sa nagapangayo sang gilayon nga bulig.
Nahibaluan nga ang BFP Roxas City, may yara lamang sang 82 ka mga katapo ang gin-deploy sa pili lamang nga mga dalagkuan nga patyo sa syudad kag umpisa Oktubre 29 tubtob Nobyembre 2, yara sila sa red alert status ukon naka-heightened alert.
Samtang, ginapasalamatan naman sang natungdan ang amo nga kadalag-an kag liwat nga nagapanwagan sa publiko nga sundon ang mga pagsulundan nga ila man ginapakigbahin agud nga malikawan ang sunog.
Interviewed by Bombo Sunnie Mae Constantino Batencila
