ROXAS CITY – May posibilidad nga mahimo na sa tatlo ka beses ang mabaton nga special risk allowances sang mga Barangay Health Workers (BHW).
Ini ang ginpahayag ni Atty. Luvim Amores, Public Information Officer sang mainterview sang Bombo Radyo.
Suno diri, may hinalaay na sa tunga ni Governor Fredenil ‘Oto’ Castro kag mga myembro sang Sanggunian Panlalawigan, nga paga-alokaran sang dugang nga pondo ang BHW agud sa masunod nga mga tinuig makabaton na ini sang allowance tatlo ka beses sa isa ka tuig.
Mahibaluan nga nagpanghatag sang special risk allowance nagabalor P2,000 si Governor sa mga BHW sa mga kabanwahan bilang pagkilala kag apresasyon sa mga ginhimo sang BHW agud mamentinar ang health sanitation kag maluwas sa balatian.
Samtang, ginhangkat man ni Gov. Castro ang mga BHW nga ganyaton ang mga household member nga ila nasasakupan nga magpabakuna na batuk sa COVID-19 agud malikawan nga mabutang sa peligro ang ila kabuhi.
Dugang pa ni Atty. Amores nga prayoridad man sang gobyerno nga pasangkaron ang kampanya batuk sa makalalaton nga balatian kaangay sang COVID-19, monkeypox kag dengue.
