Ginpasalig sang Bureau of Internal Revenue (BIR) nga padayon sila nga nagakoordinar sa nagkalain-lain nga online selling platforms sa ila pagsabat ukon pagpakig-away batok sa iligal nga vape sales.
Gin-anunsyo ni Bureau of Internal Revenue Commissioner Romeo D. Lumagui Jr. nga suno sa iya, indi lamang sa mga importers kag physical stores ang ila ginatutukan kundi mangin online man.
Ginpaambit pa niya nga nagapakig-angot sila sa amo nga mga plataporma agud kuhaon ang mga ilegal nga balaligyaan nga ginaalegar wala rehistrado ukon wala nagasunod sa legal nga proseso sang negosyo.
Samtang, aminado naman si Commissioner Lumagui Jr., nga may yara pa sang pila nga makalusot pa, ilabi na nga ang iban sekreto nga nagabaligya sa online groups ukon online marketplaces.
Apang ginpaandaman nia nga ang mga ini indi na magpadayon sa pagbaligya sang mga vape products nga ilegal bangud suno sa iya, pasakaan sila sang nagakaigo nga kaso.
Madumduman nga sang damlag lang personal nga nagpadulong sa Department of Justice si Bureau of Internal Revenue Commissioner Romeo D. Lumagui Jr., agud magpasaka sang panumbungon batok sa tatlo ka mga importers sang vape products.
Kun sa diin nagpasaka ang bureau sang bilyones pesos nga kaso nga tax evasion batok sa sini nga mga negosyo bangud sa kapaslawan sa pagbayad sang katumbas nga excise tax.
Amo ini ang rason kun ngaa nagpaandam ang nasambit nga commissioner nga online man ini ukon physical stores kag retailers, padayon ang ila pagmonitor agud matumod kag mapasakaan sang kaso ang iban nga wala nagasunod sa nagakaigo nga proseso sang negosyo.
