Nagapadayon ang recruitment sang Bureau of Jail Management and Penology (BJMP) sa Region 6, kag bukás ini para sa mga bag-o lang nga nagtapos sa kolehiyo.
Sa interview sang Bombo Radyo kay Jail Officer 1 Jerous Labrador sang Iloilo City District Jail–Male Dormitory, ginpahayag nga ginabaton sang BJMP ang mga aplikante nga may secondary eligibility, graduate with Latin honors, ukon nakapasar sa licensure exam — bisan ano pa man nga kurso.
Dugang pa sini nga may mga kwalipikasyon nga dapat matuman, lakip na ang edad nga 18 tubtob 30 anyos, may good moral character, wala sang kaso, kag physically fit. May height requirement man — 5 feet para sa kababayen-an kag 5’4″ para sa kalalakihan — apang may height waiver para sa mga kulang sa height. Importante man nga may interes mag-agi sa proseso kag training.
Nahibaluan nga kinahanglan ipasa sang aplikante ang mga dokumento pareho sang bio-data, court clearances, police kag NBI clearances. Masunod sini ang neuro exam (written kag oral), medical-dental check-up, kag agility test. Suno sa iya, pareho ang requirements kag proseso sa bug-os nga Pilipinas.
Padayon ang recruitment subong nga bulan sa Region 6, kag ginahulat na ang opisyal nga listahan sang mga newly appointed Jail Officer 1.
Samtang, sa nasambit nga rehiyon, masami nga sa Disyembre ginahiwat ang annual recruitment, apang subong may padayon nga hiring bangud sa kinahanglan sang dugang nga personnel.
Gin-athag man ni Labrador nga nagadaku ang bilang sang mga Persons Deprived of Liberty (PDLs), gani kinahanglan gid ang mas madamo nga jail officers. Nagpanawagan man siya nga ang publiko dapat mangin mas bukas sa paghangop sa sitwasyon sang PDLs kag maghatag sang oportunidad para sa ikaduha nga kabuhi.
