ROXAS CITY – Nanotisyahan ni board member Aldwin Cruz-am nga daw kaangay sa may pinilian ang pagtsekyar ukon kaisa pagpangdakop sang mga otoridad sa ginapatigayon nga checkpoint sa dalan, sa probinsya.
Sa interview sang Bombo Radyo kay Cruz-am, chairman sang committee on transportation, ginpahayag sini nga masami sini nga maagyan sa dalan ang mahaba nga pila sang motorsiklo ukon traysikol nga ginapapundo para sa checkpoint, kun sa diin nagakatingala ini kun ngaman ginapadiretso lang ang mga four-wheels nga salakyan.
Bangud sini, ginpalab-ot sang board member sa iya mga kaupdanan sa Sangguniang Panlalawigan ang iya naobserbahan, pinaagi sa iya privilege speech.
Nagalaum ini nga mapatawag ang mga natungdan nga ahensya, agud mahibaluan man sini ang rason ukon aktwal nga tinutuyo sa pagprayoridad sa mga motorsiklo ukon traysikol nga magpundo sa checkpoint.
Sa tion nga ma-justify sang concerned agencies ang tinutuyo kun ngaman motorsiklo ukon traysikol lamang ang ginapapundo sa checkpoint, ginpahayag ni Cruz-am nga indi man ini magkuwestyon.
