ROXAS CITY – Patay ang BPAT member samtang pilason ang tatlo ka persona kalakip ang duha ka mga suspek sa nagluntad nga away sa Sitio Pulong, Barangay Intongcan, Pontevedra, Capiz.
Ginkilala ang napatay nga BPAT member nga si Melchor de Juan 46-anyos sang nasambit nga lugar, samtang padayon nga ginabulong sa ospital ang isa pa ka BPAT member nga si Alfredo Arancillo nga ginaalegar ginbakbakan kag ang mag-utod nga sanday Budoy kag Joney Aguihap, ginatudlo nga responsable sa pagpangbuno, pagtiro kag paglampus sang tubo sa mga biktima.
Sa interview sang Bombo Radyo kay Police Major Christopher Candelario, hepe sang Pontevedra Municipal Police Station ginpahayag sini nga nag-ugat ang insedente sang mag-overtake ang motorsiklo nga ginamaneho ni James de Juan, anak sang napatay nga BPAT member sa motorsiklo sang mag-utod nga Aguihap.
Bangud sa insedente ginbantayan sang mag-utod nga suspek kag sang ila pakaisa si James sa diin nakaangkon sang kumprontasyon tobtob nagpangayo sang responde kay de Juan ang anak nga nagpadulong sa lugar agud magtambag sa kinagamo kag kuhaon kuntani ang cellphone ni certain Dellomos.
Sa pihak nga nagpakilala nga BPAT member si de Juan wala ini nakapugong sa mag-utod nga Aguihap kag pakaisa sang mga suspek nga si Bong-Bong Bance
para ini ang lampusan sang tubo, bun-on kag tiruhon.
