Hugot nga ginabantayan sang Philippine Coast Guard (PCG) ship BRP Teresa Magbanua ang hulag sang mga Chinese warships kag coast guard vessels nga nakit-an sa kalayuon nga 69.31 nautical miles halin sa Cabra Island sa Occidental Mindoro.
Ginkumpirmar sang tigpamaba sang Philippine Coast Guard (PCG) para sa West Philippine Sea (WPS) Commodore Jay Tarriela nga nagpatigayon sang pagpatrolya ang BRP Teresa Magbanua sa lugar kag nagpaguwa sang radyo nga hangkat sa People’s Liberation Army (PLA) Navy warship 793 agud ipahibalo ang ila mga sabat sa lugar apang wala sang sabat gikan sa Chinese nga warship.
Bilang sabat sa hulag sang nasambit nga mga barko sang China, nag-isyu ang mga tripulante sang BRP Teresa sang serye sang pagpanghangkat sa radyo apang wala sang may nabaton nga sabat gikan sa mga barko de guerra sang China.
Diri, gin-assert sang PCG nga nagapatigayon sang operasyon ang mga Chinese ships sa sulod sang exclusive economic zone (EEZ) sang Pilipinas kag ginpahanumdom nga respetuhon ang hurisdiksyon sang pungsod, magsabat sa mga komunikasyon sa radyo kag mag-untat sa pagpatigayon sang wala ginatugutan nga pagpatrolya ukon ano man nga aktibidad sa EEZ sang Pilipinas.
Samtang, ang presensya sang mga barko sa kadagatan sang Pilipinas ang nagakatabo sa tunga sang pagsaulog sang pungsod sa ika-siyam nga anibersaryo subong nga adlaw, Hulyo 12, sang ila kadalag-an sa 2016 arbitral ruling nga nag-invalidate sang malapad nga claims sang China sa WPS
