Lapit na nga makumpleto liwat ang sikat nga K-pop boy band nga BTS matapos nga opisyal nga ginpaguwa sa militar sanday Park Ji-min kag Jeon Jung-kook sang Miyerkules, Hunyo 11.
Ini matapos nga nakumpleto nanday Jimin kag JK ang ila 18 ka bulan nga mandatory military services sa South Korean military.
Nahibaluan nga ang military discharge sang duha ang isa ka adlaw matapos nga nakumpleto ang military service sang ila mga ka-banda nga sanday RM kag V kag gin-discharge sang Martes, Hunyo 10.
Si Jimin kag si JK nag-abot man sang tingob sa guwa sang ila base militar kag gintamyaw ang nagahulat nga mga fans kag media.
Sanday Jimin kag JK ang ikalima kag ikaanom nga miyembro sang BTS nga nakatapos sang ila serbisyo militar.
Madumduman nga ang una nga nakatapos sang ila serbisyo militar amo si Kim Seok-jin, nga ginsundan ni Jung Ho-seok ukon J-Hope sang nagligad nga tuig.
Sa subong, ang BTS rapper nga si Min Yoon-gi ukon Suga na lang ang nabilin sa serbisyo publiko kag ginalauman nga ma-discharge sa Hunyo 21.
Ang mga katapo sang BTS natalana nga mag-upod liwat para sa ila ika-12 nga anibersaryo sang debut sa 2025 BTS Festa nga hiwaton sa Hunyo 13-14 sa Goyang, Probinsya sang Gyeonggi
