ROXAS CITY – Suspended sa gihapon ang byahe sang mga barko halin sa syudad sang Roxas padulong sa Batangas kag Metro Manila.
Sa interview sang Bombo Radyo kay Senior Chief Petty Officer Arnel Nisola, Deputy Station Commander sang Philippine Coast Guard Station Capiz, iya ginpahayag nga ang byahe sang barko naman halin sa Roxas City padulong sa Masbate kag Romblon kag vice versa ang balik na sa normal.
Suno kay Nisola, tubtob nga may yara pa sang weather disturbance sa Batangas kag Metro Manila, magapabilin anay nga suspended ang byahe padulong sa nasambit nga mga lugar.
Apang pahayag niya, ang mga manugpangisda sa Capiz ang mahimo naman nga makapalawod bangud wala na sang storm signal sa probinsya.
May yara pa sang mga stranded nga rolling cargos lakip na ang mga pahinante kag drivers nga padulong kuntani sa Batangas kag Metro Manila.
Nagapasalamat ang Coast Guard Station – Capiz nga wala sang may narekord nga insidente sang pagkalumos sa pihak sang pag-igo sang bagyo Uwan nga may dala nga mabaskog nga hampak sang balod.
