Nagapakig-angot na ang Civil Aviation Authority of the Philippines (CAAP) sa mga counterparts sini sa Malaysia kag Singapore agud inspeksyunon ang tatlo ka rehistrado nga air assets ni Former Ako Bicol Rep. Zaldy Co.
Ini ang ginpahayag ni CAAP Director General Raul del Rosario kasunod sang anunsyo sang ahensya kahapon nga duha ka AgustaWestland helicopters nga konektado sa Co ang yara subong sa Kota Kinabalu, Malaysia nga ginpahayag naglupad didto sadtong Agosto 20 kag Setyembre 11.
Digang pa sang natungdan, yara na ang eroplano nga Gulfstream sa Singapore halin pa sang Agosto 16.
Magluwas sa tatlo ka air assets ni Co, ginamonitor man sang ahensya ang 10 pa ka iban nga nagapabilin sa pungsod.
Matandaan nga sang nagligad nga bulan, ginbuyagyag ni DPWH Sec.Vince Dizon nga ginbalabagan sang CAAP ang pagtinguha sang mga kompaniya nga konektado kay Co nga i-deregister ang tatlo ka mga choppers nga ginhingyo sang DPWH nga i-freeze.
Samtang, ginbuyagyag sang opisyal sang CAAP nga wala sang air assets nga narehistro sa pangalan ni anay House Speaker Martin Romualdez.
Nahibaluan nga lunsay involved sanday Co kag Romualdez sa isyu sang maanomaliya nga mga flood control projects nga gin-alegar nakabaton sang kickbacks, bagay nga makapila ka beses nga ginpanginwala sang duha.
