CAPIZ – Ginasiguro sang Capiz Electric Cooperative (CAPELCO) ang publiko nga may yara sang bastante nga supply sang kuryente sa probinsya subong nga holiday season.
Sa interview sang Bombo Radyo kay General Manager Engr. Edgar Diaz, iya ginpahayag nga indi kinahanglan nga magkabalaka ang mga residente bangud estable ang power supply kag preparado ang mga Sistema.
Suno kay Diaz, nagapakig-angot ang CAPELCO sa mga power suppliers kag naga-monitor sa sitwasyon agud masiguro nga magapabilin nga steady ang kuryente subong bangud madamo sang mga selebrasyon nga ginapatigayon sa diin madamo sang tawo ang nagagamit sang suga kag appliances.
Ang maintenance teams sang CAPELCO ang naka-standby naman agud makaresponde sang madasig sa tion nga may yara sang problema sa kuryente ukon emergency situation.
Nagpahanumdom si Engr. Diaz sa publiko nga maggamit sang kuryente sang insakto kag likawan ang overloading outlets agud malikawan ang aksidente.
