ROXAS CITY, CAPIZ- Nangin madinalag-on ang isa ka Capisnon sa 2025 World Police and Fire Games nga ginpatigayon sa Birmingham, Alabama, USA.
Sa interview sang Bombo Radyo kay Police Executive Master Sergeant Anthony Hoechst P. Alba, katapo sang Capiz Maritime Police Station, iya ginpahayag nga ang pag-angkon sang bulawan nga medalya ang indi nangin madali kundi isa ka pamatuod sang dedikasyon kag paningasog.
Dugang pa sini, tuman ang kasadya nga iya nabatyagan sang pag-angkon sang amo nga medalya, bangud suno sa iya, madugay nya na ini nga handom kag para sa iya, ang nasambit nga medalya ang indi lamang nga bugal nya kundi sang bug-os nga Pilipinas.
Ini man ang labing-una nga kahigayunan nga nagpasakop sa amo nga kompetisyon.
Nahibaluan nga isa ini sa mga nangin representate sang Pilipinas sa amo nga pahamtang kag nagaisahanon nga Capisnon nga nakapasakop sa hubon sang mga tiglawas sang pungsod.
Ang nasambit nga medalya ang nakuha sa sport sini nga Men’s 40+ Doubles category sa diin nga ka duo niya sini si Police Executive Master Sergeant sang Samar.
Samtang, ang 2025 World Police and Fire Games, isa sa pinakadako nga multi-sport events para sa mga miyembro sang mga otoridad sa diin nga ginpasakupan ini sang kapin 10,000 ka mga atleta nagikan sa masobra 70 ka mga kapungsuran.
Nagpalab-ot naman sang dako nga pagpasalamat si Alba sa tanan nga mga tawo nga nangin kabahin sang iya napagkit nga kadalag-an.
Interviewed by Bombo Francis Biñas and Bombo Sunnie Mae Batencila
