ROXAS CITY – Ginpangunahan ni Capiz 2nd district representative Fredenil “Oto” Castro ang pagpanagtag sang Educational Assistance sa masubra 40 ka mga estudyante sa kolehiyo nagikan sa 1st district sang probinsya pinaagi sa Department of Social Welfare and Development (DSWD) nga ginhiwat sa talapatan sang DSWD sa San Roque Extension, Roxas City.
Suno kay Castro nga una na nga ginpanghatag ang Educational Assistance sa mga estudyante sa kolehiyo sang segundo distrito sang probinsya sang tinalikdan nga bulan.
Gindugang ni Castro nga masubra na 40,000 ka mga estudyante ang nangin iskolar sa iya nga termino bilang kongresista indi lamang sa 2nd district kun sa diin ini nagapangalagad, kundi kalakip man sa 1st district sang probinsya.
Nagpanugyan man si Castro sa mga kabataan nga mangin matutom sa ila pagtuon agud makabulig sa ila ginikanan sa tiun nga makatapos ang mga ini sa kolehiyo.
