ROXAS CITY – Wala sang lamud-pamulitika ang pagbisita ni Capiz 2nd District Congressman Fredenil “Oto” Castro sa Roxas City Hall.
Ini ang ginpanindugan mismo sang kongresista sang mainterview sang Bombo Radyo.
Suno kay Castro, nga mayor nga katuyuan sang pagbisita sini sa talatapan ni Roxas City Mayor Ronnie Dadivas amo ang mahibaluan ang ginapangatubang nga mga problema sang siyudad.
Nakakita man ini sang solusyon sa madugay na nga problema sa supply sang tubig bangud ginakulang ang Metro Roxas Water District (MRWD).
Plano man sini nga magpatukod sang isa ka bulk water supplier diri sa syudad pinaagi sa isa ka supplier sang MIZU Resources nga si Director Erica Santos.
Sa tion nga masolusyonan ang problema sa supply sang tubig sa syudad makabenipisyo man diri ang pila ka mga kaiping nga kabanwahanan.
Pagalauman man suno kay Castro ang magaabot nga budget gikan sa Bureau of Fisheries and Aquatic Resources (BFAR) Region 6 nga kapin P1 million agud masulosyunan ang problema sa mga kasabuaan.
Suno kay Castro nga sang iya ginpa-trace ang mga ‘troll’ accounts sa social media nga nagapalapta sang mga sala nga impormasyon batuk sa iya, nagaguwa nga gikan ini sa pihak nga kampo.
Bangud diri nagpaandam ang kongresista nga indi siya paggarit-gariton bangud kun magapadayon pa ini, iya na lamang nga minatud-on nga siya ang magapapili sa pagka-gobernador sang probinsiya sa masunod nga eleksiyon.
