ROXAS CITY – Tuman ang pagpasalamat sang isa ka Capizeña nagikan sa Barangay Poblacion Sur, Ivisan, Capiz matapos nga na-promote bilang isa ka staff sergeant sang US Air Force sa Estados Unidos.
Sa Good Morning Philippines program sang Bombo Radyo ginpakigbahin ni Staff Sergeant Alyssa Mae Diestro ang iya mga naagihan antes nangin isa ka katapo sang US Air Force.
Suno kay Diestro nga wala nagsulod sa iya pinsar nga mangin isa ka suldado bangud handum niya kuntani nga mangin isa ka nurse.
Apang, sang pag gradwar sini sa Ivisan National High School gindala ini sang iya pamilya sa pungsod sang Estados Unidos kun sa diin didto niya ginpadayon ang iya nga pag-eskwela tubtob nga nadiskubrehan sini ang luyag nga mangin kabahin sang US Air Force.
Aminado ini nga indi nangin mahapos ang iya naagyan sa Estados Unidos bangud samtang nagaeskwela naga-trabaho man ini sa isa ka restaurant.Ginpahayag pa ni Diestro nga tuman kabudlay ang sitwasyon sa America ilabi na subong nga pandemya.
Mahibaluan nga samtang naga-trabaho ini bilang isa ka katapo sang Air Force madamo naman sang mga pagtilaw ang nag-abot sa iya nga kabuhi.
Kalakip na diri ang pagpaidalom sa pila ka mga operasyon bangud sa bukol nga una na nakita sa iya kili-kili tubtob nga na-impeksyon rason nga ginpaidalom niya ini sa operasyon agud indi mahulog sa Breast Cancer.
Apisar nga may yara ini sang balatian, padayon sa gihapon ang iya trabaho agud mahatag lamang ang handum kag suporta para sa iya pamilya.
Indi man madula ang iya nga kulba sa tagsa ka adlaw bangud wala ini nakahibalo sa iya madangatan sa ulihi.
Apang, suno kay Diestro nga nagpasalig gid ini sa iya pamilya nga himuon niya ang tanan bisan ano pa ka-delikado ang iya nga trabaho.
Samtang, nagpasalamat naman ini sa mga tawo partikular na sa iya pamilya nga wala nagauntat sa pagpangamuyo para sa iya “safety” samtang yara sa trabaho kag sa madasig nga recovery sa ginasuprehir sini nga balatian.
