CAPIZ – Tuman ang kalipay sang isa ka Capiznon sa nakuha sini nga silver medal sa Petanque Double Mixed sa 33rd South East Asian Games 2025 sa Thailand.
Sa interview sang Bombo Radyo kay Petty Officer 3rd Class Clyde Joy Baria nga tumandok sang Barangay Candual, Panay, Capiz, iya ginpahayag nga ang nasambit nga sport ang bag-o pa lang nga ginpakilala sa Pilipinas gani gamay pa lang ang mga player sini.
Suno kay Petty Officer 3rd Class Baria, bug-os sini ang iya nga tagipusuon sa training kag ginapamatian gid ang tanan nga advice sang iya nga coach nga makabulig sa iya nga focus kag disiplina.
Pahayag pa niya, maluwas sa petanque, nakakuha man ini sang madamo nga mga kadalag-an sa nagkalain-lain nga sports lakip na ang gold medal sa Taekwondo, Karate, kag tatlo ka gold medal sa Muay Thai Championship kag nagin overall champion man ang ila grupo sa Philippine Coast Guard Dragon Boat nga ginhiwat sa Indonesia.
Apisar may katungdanan ini bilang isa ka miyembro sang Philippine Coast Guard, ginasiguro nya nga mabalanse ang iya nga training bilang atleta kag trabaho bilang isa ka public servant.
Nagapasalamat man ang natungdan sa tanan nga nagsuporta sa iya ilabi na sa iya nga pamilya kag mga kaupod sa ubra nga wala gid nagakataka sa pagbulig kag pagsalig sa iya.
INTERVIEWED BY: BOMBO SAIRA JOY ALU-AD BAUTISTA AND BOMBO ROADNIE DABAN DALANON
