ROXAS CITY – Nagpatigayon sang initial assessment ang tagdumalahan sang Capiz 1st Engineering District sang Department of Public Works and Highways (DPWH) sa maka-alarma nga paglapad sang gina-ab-ab nga duta sa pila ka porsyon sang Panay river sa banwa sang Panit-an.
Sa interview sang Bombo Radyo kay Engineer Randolfo Melosantos, District Engineer sang DPWH-Capiz, suno diri, bangud sa tuman nga volume sang tubig sang pagbaha sang bagyong Agaton, ang gintunaan sa paghumok sang duta, rason sang nasambit nga soil erosion.
Dugang pa sini, nga magabisita sa lugar sa masunod nga semana ang katapo sang DPWH central office, agud magpatigayon sang final assessment para sa nagakaigo nga restoration ukon repair nga kinahanglan sa lugar.
Ginpahayag man sini nga kinahanglan minimum sa mas o menus 6 ka metros ang kalayuon halin sa suba, wala sang nagapatindog nga balay ukon edipisyo diri, bangud tuman ini ka dellikado.
Nagrekomendar man si Melosantos sang P650 million nga request nga pondo para sa repair ukon restoration sang mga naguba nga imprastraktura kalakip ang mga karsada kag river control nga naguba bangud sa kalamidad, sa bug-os na ini nga primero distrito sang probinsya.
