TAPAZ, CAPIZ – Nasapwan nga patay ang isa ka lalaki sa higad sang sapa sa Barangay San Antonio, Tapaz, Capiz.
Ang biktima amo si alyas “Jim”, 46-anyos kag residente man sang nasambit nga lugar.
Sa interview sang Bombo Radyo kay Police Captain Joebert Delos Reyes, hepe sang Tapaz Municipal Police Station, iya ginpahayag nga ang lawas sang biktima ang nakit-an sang isa ka barangay official nga gilayon man nga gin-respondehan sang mga kapulisan.
Gindala ang lawas sini sa Tapaz District Hospital apang gindeklara nga dead on arrival.
Suno kay Delos Reyes, base sa inisyal nga findings sang post mortem investigation, cerebral hemorrhage ang ginalantaw nga kabangdanan sang kamatayon sang biktima.
Pahayag pa niya, nagapati man ang pamilya nga wala sang natabo nga foul play sa kamatayon sang ila nga himata.
Sa subong, yara na sa isa ka punerarya ang bangkay sang nasambit nga biktima.
Nagpanawagan man ang natungdan sa publiko sang kooperasyon sa pagpalab-ot sang mga impormasyon sa ila talatapan agud nga matapna ukon gilayon nga ma-aksyunan ang mga problema.
INTERVIEWED BY: BOMBO ROADNIE DABAN DALANON VIA ZONA LIBRE
