ROXAS CITY – Ginklaro sang chairman sang Committee on Health sang Sangguniang Panlalawigan nga wala sang may ginpain nga pondo ang gobyerno pag-abot sa fuel sang mga ambulansiya sa mga ospital sa probinsya sang Capiz.
Ini ang ginpahayag ni Board Member Doc. Steve Contreras sang ma-interview sang Bombo Radyo.
Suno kay Contreras nga sandig sa Revised Revenue Code of the Province of Capiz series of 2017, may yara sang balayran ang mga pasyente sa paggamit sang ambulansiya bangud para ini sa fuel kag sa maintance.
Gilayon nga nagpatigayon sang pagpangusisa si Contreras sa Bailan District Hospital sa pagpamuno ni Dr. Venus Loretizo kag didto nahibaluan nga ginsunod man sang pamunuan sang ospital ang nasambit nga pagsulundan kun sa diin sa P5, 000 nga ginapabayad, ang P3,500 ang para sa fuel sang ambulansiya kag ang 1,500 ang nagkadto sa off duty nga nurse.
Ginklaro ni Contreras nga sa amo nga ospital may yara sang tini-on nga nagadepende sa pasyente ang ila nga pagsuloktan sa paggamit sang ambulansiya, bangud kun pigado ang pasyente wala naman ini ginasukot sang para sa krudo.
Ginpasalig ni Contreras sa publiko nga pagatun-an sini ang formula kag probisyon sa pagsuloktan sang paggamit sang ambulansiya sandig sa nasambit pagsulundan agud mapanubo ang pagsuloktan sa mga pasyente ilabi na kun pigado kag mga emergency cases.
Apang nagadependi na lamang ini sa provincial board kun ila ini nga aprubahan.
Samtang nagapadayon sa gihapon ang ginapatigayon nga imbestigasyon sang Hospital Management Unit (HMU) sa ginareklamo natuhoy sa amo nga ospital.
Matandaan nga nagdangop sa Bombo Radyo ang isa ka iloy agud ireklamo ang tuman ka mahal nga pagpanukot para sa ambulansiya kag sala nga findings sang doktor sang nasambit nga ospital sa iya naaksidente nga anak.
Suno kay Nanay Inday, naaksidente sa motorsiklo ang iya anak sadtong Disyembre 24, 2019 kun sa diin nasamaran ang ulo sini rason nga gindala nila sa amo nga ospital.
Suno diri nga gin-refer sila sa Western Visayas Medical Center sa Iloilo bangud suno sa doktor na-fracture ang ulo sang iya anak apang pag-abot diri nagguha sa findings sang doktor nga napak-ad lamang ang panit sang ulo sang iya bata.
Magluwas diri nagalain man ang buot sang ginang bangud ginsukot sila sang P5, 000 agud maggamit ang ambulansiya sang ospital kun sa diin ang P1, 500 diri ang ginhatag sa nurse nga magaupod samtang ang P3, 500 ang gingamit naman para sa krudo sa ambulansiya.
