ROXAS CITY-Pormal na nga nagpungko bilang Chairman sang Committee on Infrastructure sang Sangguniang Panlungsod si City Councilor Midelo Ocampo tal-us kay City Councilor John Paul Arcenas.
Ini ang ginkompirmar ni City Councilor Ocampo sang mainterview sang Bombo Radyo.
Suno kay Ocampo nga nagapasalamat ini sa bug-os nga miyembro sang konseho bangud sa ila nga pagsuporta sa pagtal-us sini sa kay Arcenas.
Gnpahayag sang opisyal nga ang pagpungko sini bilang bag-o nga chairman sang nasambit na kometiba ang kabahin lamang sa pagtuman sang nangin kasugtanan nila ni Arcenas nga kun matapos ang isa ka tuig nga pagpangalagad sini, igahatag na sini ang komitiba kay Ocampo.
Ginpahayag man ni Ocampo nga dako ini nga kahigayunan para sa iya agud mabuligan si Roxas City Mayor Ronnie Dadivas para sa pag-implementar sang mga proyekto kag pinaagi sa pag-asister sa City Engineers Office.
Nagpasalig ini nga pagatinguhaan nga tapuson ang mga wala natapos nga proyekto sang nakaligad nga administrasyon.
Gindugang pa ni Ocampo pagatutukan sini amo ang Declogging sa mga drainage sa mga kabarangayan nga apektado sang masami nga pagbinaha-baha sa tion nga magabubu ang mamunog nga ulan.
Wala man sini mapunggan nga maghatag sang pahayag angut sa tuman kalapok nga dalan sa Barangay Mongpong sining syudad.//
Ginkalipay sini ang natalana nga pagpasementohon ang nasambit nga dalan bangud madugay naman ini nga ginahinyo ni Punong Barangay Ricky Donato nga sementohon ang amo nga dalan.
Suno kay Ocampo nga may gamay pa nga kakulangan pag-abot naman sa estado sang Dog Pound sa Barangay Dinginan sining syudad.
Nagalaum si Ocampo nga mapundohan na sang siyudad ang operasyon sang dogpound sa madasun nga tuig.
