ROXAS CITY – Aminado ang tagdumalahan sang City Engineer’s Office nga tatlo na ka-tuig ang nakaligad sang nagrequest ang administrador sang Roxas City Integrated Transport Terminal (RCITT).
Ini ang ginpahayag ni Engr. Noel Laminares, sang mainterview sang Bombo Radyo.
Suno diri nga sa ila nga pagreview sang request, natukiban nga madugay na gid man nga naghinyo si RCITT Administrator Mr. Victor Arcenas nga panamion ang terminal kag ipakay-o ang Comfort Rooms (CR), kag ini sang indi pa siya ang nagapungko bilang City Engineer, kundi sa nagligad pa nga administrasyon.
Bangud sini, gilayon nga ginmanduan ni Laminares ang ila tinawo nga tsekyaron ang problema sa terminal agud masuguran na ang pagpakaayo sang CR nga amu ang paga-unahon kag iga-sunod ang pagpinta kag iban pa.
Matandaan nga sa interview sang Bombo Radyo kay Arcenas, wala sini mapunggan nga magpabutyag sang iya kalain sang buot sa City Engineer’s Office bangud sa wala pag-aksyon sang iya nga request nga sa pagkamatuod suno diri, may yara sang pondo nga P2 million ang terminal para sa maintenance sang amu nga establisyimento.
