ROXAS CITY – Ginkompirmar sang City Health Officer nga may isa ka Locally Stranded Individual ukon LSI ang nagpositibo sa siyudad sang Roxas.
Sa interview sang Bombo Radyo kay Dr. Lory Cahilog ginpahayag sini nga isa ka 21-anyos nga LSI nga residente sang Barangay Libas sining siyudad ang nagpositibo sa COVID-19 nga may yara sang travel history sa Metro Manila.
Suno kay Cahilog nga nag-negatibo sa Rapid Test ang nasambit nga LSI apang nagpositibo ini sa Real-Time Polymerase Chain Reaction ukon RT-PCR test.
Gindugang pa ni Cahilog nga nagapabilin nga “Asymptomatic” ang nasambit nga LSI humalin sang ginpaidalum ini sa 14-day home quarantine.
Padayon naman ang ginapatigayon nga contact tracing sa mga indibidwal nga naka-close contact sang nagpositibo nga LSI.
Ginpahayag ni Cahilog nga may yara ini sang kaupod sa barko nga nagpauli sa probinsiya nga una naman nagpositibo sa nasambit nga balatian.
Sa karon, nagapabilin nga ginaquarantine ang nasambit nga LSI sa Barangay Quarantine Facility sa nasambit nga barangay.
Samtang, wala naman malikawan ni Cahilog nga magkabalaka angut sa kakulangan sang koordinasyon sang probinsiya natuhoy sa mga nagapalauli nga mga LSI’s.// Ginpabutyag naman sini nga kun mahimo ihatag sang probinsiya ang listahan sang magaabot nga mga LSI’s duha ka adlaw antes ang ila pagpauli agud nga mapreparahan ini sang siyudad.
