Ginsuportahan sang pila ka senador ang panawagan ni President Ferdinand Marcos Jr., nga courtesy resignation sang Cabinet secretaries nga may katuyuan nga i-recalibrate an administrasyon matapos ang eleksyon.
Ginpahayag ni Senate President Francis “Chiz” Escudero nga kinahanglan sang gobyerno nga masaligan kag maayo nga kabulig sa pagdumala sang pungsod.
Ginhatagan pagtamod sang senador nga dapat magaumpisa sa ugsaran sang presidente ang pagkaayo kag ginrekomendar man sini nga magdistansya sa mga nagapabug-at nga kaalyado sini.
Dugang pa ni Escudero, kun nagapalya ang gobyerno, ang pumuluyo ang nagakabudlayan.
Samtang, wala naman sang may nakit-an nga sala si Senate President Pro Tempore Jinggoy Estrada sa ginhimo sang pangulo—ilabi na kun ang amo nga tikang ang kabahin sang pagpaninguha nga naghuman sang isa ka liderato nga sarang magdul-ong sang maayo, may accountability, kag naga-response nga gobyerno.
Dugang ni Estrada, ginagamit lamang sang presidente ang iya nga gahon sandig man sa Konstitusyon.
Para naman kay Senador Sherwin Gatchalian, dapat magserbe nga kahigayunan sa mga gabinete ni Presidente Marcos nga usisaon ang ila nga mga performance.
Pahayag niya nga ang tanan nga ginpahamtang nga miyembro sang Gabinete, antes man ukon madugay na nga nagaserbisyo ang kinahanglan pamatud-an nga kaya nila ngs magpanguna nga may madasig nga aksyon kag bastante nga ikasarang.
Nagapati naman si Senador JV Ejercito nga ginbase ni President Marcos ang iya nga desisyon sa nangin resulta sang midterm elections.
Suno pa kay Ejercito nga umpisa subong kinahanglan nila mangin alerto kag handa nga maghulag.
Nagalaom naman ni Senadora Nancy Binay nga wala sang mangin delay sa serbisyo sang mga ahensya kag mangin madasig ang pagbulos sa mga kakson nga gabinete.
Ginarespeto sang senadora ang kagustuhan sang pangulo nga manduan sang courtesy resignation ang iya mga gabinete bangud nagaserbe man ang mga ini sa luyag sang presidente.
Pahayag pa niya nga dapat handa ang gobyerno sa mga ahensya nga maislan ang nagadumala agud wala sang maatrasar nga mga programa.
