ROXAS CITY – Naghatag sang reaksyon ang isa ka criminal lawyer natuhoy sa pagpahamtang ni Presidente Rodrigo Duterte kay Vice President Leni Robredo bilang co-chairperson sang Inter Agency Committee on Anti-Illegal Drugs (ICAD).
Sa interview sang Bombo Radyo kay Atty. Nelson Borja ginpahayag sini nga may posibilidad nga makakuha sang ensakto nga historical perspective ang bise presidente sa diin makita sini ang dako nga problema sang iligal nga droga sa Pilipinas kag mangin kumbinsido ini nga tama ang mga polisiya nga ginpatuman ni Presidente Duterte.
Sa pihak sang pagbaton ni Robredo sang posisyon suno kay Borja may posibilidad nga mabal-an sang bise presidente ang sala nga polisiya ni Duterte sa diin mahimo ini magserbi bilang witness sa ulihi sa mga ginahimo sang presidente.
Magluwas diri, mahimo man nga maggamit ini sang bise presidente bilang ebidensya nga makabulig sa mga kritiko ni Duterte angut sa mga panumbungon nga ginapasaka sa iya.
Suno kay Borja nga mahimo makabulig si Robredo sa pagtapna sang iligal nga drogra sa pungsod apang mahimo man ini nga makadisgrasya sa administrasyong Duterte.
Ginpahayag pa sini nga subong ginbaton na ni Robredo ang posisyon sa ICAD, nagalaom ang tanan nga makahatag ini sang nagakaigo nga solusyon agud mangin madinalag-on ang kampanya kontra iligal nga droga.
Dugang pa sini nga nakadepende na kay Robredo kun ano ang iya ipatuman nga mga polisiya.
Matandaan nga ginpahayag ni Presidente Duterte nga igapaidalom sini ang iya nga police power kay Robredo para siya ang magaresolbar sang problema sa droga sa pungsod matapos ini nga ginpakamalaut sang bise-presidente.
