ROXAS CITY-Duha ka mga pilas sa likod ang naangkon sang delivery boy matapos nga ginaalegar nga ginlabo sang wala matumod sang suspek sa Roxas Avenue, Roxas City.
Ang biktima ang ginkilala nga si Ronnie Pancha, 21-anyos, delivery boy kag residente sang Barangay Mianay Sigma, Capiz.
Sandig sa pagpangusisa sang Bombo Radyo Roxas nga nag-inom ang nasambit nga biktima kaupod sang iya nga mga barkada sa nasambit nga lugar.
Apang ginaalegar sini nga samtang nagapapauli na sakay sa iya nga bisikleta, may yara sang ginaalegar bugaw nga naghagad sa iya nga magkuha sang G.R.O.
Apang sang tion nga namalibad ini sa nasambit nga bugaw, hinali nga may naglabo sa iya nga likod.
Gilayon nga nagpadulong sa Roxas City Police ang biktima agud mangayo sang responde.
Dugang pa ni Pancha nga wala sini makit-an kun sino ang naglabo sa iya.
Ginaalegar pa ni Pancha nga samtang ginatransaksyon ini sang wala matumod nga bugaw, nabatyagan sini nga may yara sang kamot nga nagakuot sa iya kun sa diin nadiskubrehan sini nga wala na ang iya P800 nga kuwarta.
Sa karon padayon pa nga gin-aimbestigaran sang mga kapulisan ang amo nga insidente.
