Ginkalipay sang grupo nga Digital Pinoys ang kasuguan sang Bangko Sentral ng Pilipinas (BSP) nga kakason ang tanan nga icon kag link sa mga online gambling platforms halin sa mga e-wallet applications.
Suno sa Digital Pinoys, isa ka consumer advocacy group, ginasuportahan nila ang tikang sang BSP bilang kabahin sang mas malapad nga kampanya batok sa nagalala nga problema sang online sugal sa pungsod.
Nagapati si Ronald Gustilo, convenor sang grupo, na ang pag-angkon sang direkta nga access sa mga gambling sites sa sulod sang e-wallet apps ang nangin dalan agud mas madasig nga makasugal ang mga Pilipino, kalakip na ang mga pamatan-on.
Dugang pa sang advocacy group, kinahanglan nga magpatigayon sang mas madalom nga imbestigasyon ang mga otoridad agud matumod kun paano nakasulod ang mga gambling links sa mga app nga ginagamit sa adlaw-adlaw nga transaksyon.
Nagapanawagan man sila sa mga e-wallet providers nga mangin mas responsable sa pagpatuman sang mga patakaran kag siguruhon nga indi na matabo liwat ang kasubong nga sahi sang paglapas.
Samtang, pila naman ka mga mamalidha kaangya nanday Sen. Erwin Tulfo kag Pia Cayetano ang nagpalab-ot sang suporta sa BSP kag nagpanawagan sang mas hugot nga regulasyon, ukon dalayon na nga pagdumili sang online gambling sa pungsod.
Ang BSP naghatag sang 48-oras nga palugit sa mga e-wallet companies agud kakson ang mga nasambit nga link, kasunod sang report nga may pila ka mga apps nga may direkta nga koneksyon sa mga gambling platforms.
