ROXAS CITY, CAPIZ – Suportado sang mga personnel sang Bureau of Jail Management and Penology – Roxas City ang Memorandum Circular No. 2025-082 sang Department of the Interior and Local Government (DILG) nga nagadumili sa tanan nga DILG personnel, employees sang iya attached agencies, kag tanan nga elected kag appointed local government officials sa paggamit sang online gambling platforms ukon paghampang sang ano man nga sahi sang online gambling.
Sa interview sang Bombo Radyo kay Jail Superintendent Julius Cesar V. Chavez, Jail Warden sang Roxas City BJMP, iya ginpahayag nga antes paman ang ini nga Memorandum Circular, hugot na nga ginadumilian sa mga BJMP personnel ang online gambling.
Suno kay Chavez, sa subong wala pa nakabaton ang ila talatapan sang circular apang sa tion nga mabaton na nila ini, mas mangin mabakod pa gid ang ila pag-implement sa pagbawal sa mga empleyado sa pag-engage sa online gambling.
Nahibaluan nga nakasaad sa Memorandom Circular nga ang pag-engage sa online nga sugal nagapahuyang sa kredibilidad sang isa ka institusyon kag ginapalayo ang ila ginsumpaan nga katungdanan nga magserbisyo nga may integridad, ikasarang, kag tampad.
Mensahe ni Chavez sa mga personnel ukon empleyado sang gobyerno nga likawan ang paghampang sang online gambling agud maka-focus kag alerto sa trabaho.
– Interviewed by: Bombo Jessa Siman De Los Santos
