ROXAS CITY-Ginpasalig sang Regional Director sang Department of Health Region 6 nga magapadala sila sang dugang nga mga medical frontliners sa probinsiya sang Capiz.
Sa interview sang Bombo Radyo kay Dr. Marilyn Convocar ginpahayag sini nga nga magapadeploy ang DOH sang 6 ka mga nurses kag 2 ka mga doktor agud madugangan ang mga medical frontliners sa Roxas Memorial Provincial Hospital.
Ginkompirmar sini nga naghinyo sa iya si Capiz First District Representative Emmanuel Tawi Billones Sr., sang dugang nga augmentation sa mga medical frontliners sandig sa hinyo sang Capiz Medical Society.
Aminado si Convocar nga kulang sa mga medical frontliners sa bug-os nga Western Visayas bangud mangin sa iban nga kaiping nga kaprobinsiyahanan nagahinyo man sang dugang nga mga frontliners.
Matandaan nga personal nga nagtawag si Billones kay Convocar agud nga madugangan ang frontliners sa probinsya.
Samtang, indi pa mapat-ud sang DOH-Region 6 kun yara na sa Second wave ang coronavirus ukon COVID-19 sa Western Visayas.
Suno kay Convocar nga wala pa napamatud-an sa pagtun-on nga yara na sa second wave ang COVID-19 bangod sa padayon kag madasig nga paglaton sang virus apang ginkompirmar sini nga may yara na sang local tranmission sa rehiyon.
Apang, dako ang posibilidad nga tuga ini sang mga kapabayaan sang publiko bangud wala ini nagasunod sa mga health protocols.
