Driver sang motorsiklo natuslok sang kawayan ang kamot matapos makabunggo sa trak

ROXAS CITY – Natuslok ang kamot sang driver sang motorsiklo matapos aksidente nga magbunggo sa nalikod nga bahin sang trak nga nagakarga sang kawayan sa Barangay Duran, Dumalag, Capiz.

Ginkilala ang biktima nga si Rafael Fermosel nga padayon pa nga ginabulong sa ospital.

Gikan sa banwa sang Tapaz ang biktima kag pauli na kuntani sa banwa sang Dumalag kaupod ang backrider nga si Wilson Gerbaliga.

Apang bangud sa madasig nga pagpadalagan sang motorsiklo ni Fermosel wala sini nadiparahan ang naka-parked nga trak sa kilid sang kalsada nga may karga nga mga kawayan.

Wala ginalauman nga madulaan sang preno ang motorsiklo kag diretso ini nga nagbunggo sa trak.

Sa impact sang pagkabunggo, natuhog sang kawayan ang kamot ni Fermosel.