ROXAS CITY – Naga-antos sa karon ang pila ka mga drivers bangud sa wala untat nga pagtinaas sang presyohanay sang gatong kun sa diin gamay nalang nga kantitad sang kuwarta ang ila ginapauli para sa ila pamilya.
Sa interview sang Bombo Radyo kay Ruel Pioquid, driver sang van sa Kalibo-Roxas vice versa sa Pueblo terminal, ginpakigbahin sini ang ila pag-antos nga mga driver kun sa diin suno diri, masakit sa bulsa ang sa karon tuman kag asod-asod nga pagtaas sang krudo.
Dugang pa ni Pioquid, damo na sang mga drivers ang nag-uluntat sa pagmaneho apang isa ini sa mga wala nag-untat bangud amu lamang ini ang nahibaluan niya nga pangabuhian.
Ginsiling man sini nga anay P800 lang full tank na ang salakyan apang sa karon nagalab-ot na sa P1500 ang ginapatughong sang mga drivers kun sa diin P200 nalang ang porsyento nga ginahatag sa ila kag ginapauli bangud indi man sila ang tag-iya sang van.
Nabudlayan man si Pioquid kalakip na ang iban pa nga drivers bangud gamay na gani ang mga pasahero tuga sang COVID, nagtaas pa ang presyo sang gatong kag mga balaklon.
Pangabay sang mga drivers nga kuntani may magbulig sa ila kag maghimo sang tikang ang gobyerno national agud mapanubo ang presyo sang gatong.
