ROXAS CITY— Ginalauman nga sa bulan sang Hunyo pa posible nga ipanagtag ang bulig pinansiyal sang gobyerno sa mga Yolanda victims nga wala pa nakabaton sang bulig humalin nga nagpanalasa ang super typhoon Yolanda.
Sa interview sang Bombo Radyo kay Usec. Hope Hervilla sang Department of Social Welfare and Development (DSWD), gin-athag sini nga yara sa validation stage pa lamang sila sa karon kag pagkatapos pa sini ma-finalize ang mga nagakadapat nga mga benipisyaryo nga hatagan sang cash card nga ila nga gamiton sa pag-claim sang bulig pinansyal.
Suno kay Hervilla, nagahalong sila sa validation nga ginapatigayon agud masiguro nga ang kwalipikado nga benepisyaryo ang mahatagan sang bulig labi na ang wala nakabaton sang Emergency Shelter Assistance ukon ESA kag housing.
Ginkumpirma man sini nga nabaton na sang ahensiya ang pondo apang nagpanawagan sa mga nagahulat nga makabaton sang bulig pinansiyal nga paawigon pa ang ila nga pasensiya.
