ROXAS CITY, CAPIZ- Gin-athag sang Department of Social Welfare and Development (DSWD) nga wala sila nagapangkakas sang mga pangalan nga yara sa listahan para sa Emergency Cash Transfer Program.
Sa interview sang Bombo Radyo kay Therese Fely Legaste, Regional Information Officer sang Department of Social Welfare and Development Region VI, iya ginpahayag nga ang lista nga ila ginapondohan para sa ayuda ang nagikan sa tagsa ka mga Municipal Social and Welfare Development Offices (MSWDO) nga natipon man nila halin sa tagsa ka mga barangay.
Suno kay Legaste, ang barangay mismo ang una nga naga-assess sa mga pumuluyo nga kun matuod nga apektado sang mga bagyo nga nag-agi sa rehiyon.
Pahayag niya, ang pagkakas sang mga pangalan sang pila ka mga benepisyaryo, kinahanglan nga usisaon ini sa tagsa ka mga Municipal Social and Welfare Development Offices (MSWDO) ukon sa Local Government Units para sa pagpaathag kag indi sa ila nga talatapan bangud nga naga-base lang man sila sa kun ano ang gin-endorso sa ila nga lista.
Ginsiling man sini nga kun kaisa may posibilidad nga ginakakas ang pangalan bangud sa may mga sala sa spelling sang pangalan ukon sa iban pa nga datos apang ang lokal ang nagapangamot kag indi sa ila nga bahin.
Nagpahanumdom naman ang natungdan nga kun may mga reklamo natuhoy sa nasambit nga ayuda, usisaon gid anay sa barangay kag kun luyag pagid nga maathagan, makig-angut sa Municipal Social and Welfare Development Offices bangud nga yara sa ila ang pinal nga lista antes nga gina-endorso sa Department of Social Welfare and Development.
Interviewed by Bombo Sunnie Mae Constantino Batencila
