Dead on Arrival ang duha ka indibidwal matapos nga maaksidente ang ila ginamaneho nga motorsiklo sa national highway sang Brgy. Tanza Norte, Panay, Capiz.
Ang mga biktima amo sanday alyas Randy 22-anyos driver sang motorsiklo, kag si alyas Jomar 17 anyos backrider kag residente sang Brgy. Banica, Roxas City.
Sa interview sang Bombo Radyo kay, Police Captain Eric B. Deocampo, Hepe sang Panay Municipal Police Station, iya ginpahayag nga nagabiyahe ang duha sakay sang motorsiklo halin sa Panay Ville, Poblacion Ilaya, Panay padulong kuntani sa Roxas City sang hinali na lang ini nga nadulaan sang control kag aksidente nga nagliko ang motorsiklo pakadto sa tuo nga bahin sang dalan kag nagbunggo sa concrete gutter.
Bangod sini, nagtabog ang duha ka biktima halin sa motorsiklo kag nalampos ang ila ulo sa concrete post sang steel barrier sa kilid sang dalan.
Gindala pa ang mga biktima sa Roxas Memorial Provincial Hospital, apang gindeklara ini nga dead on arrival sang attending physician.
Dugang pa sini, nga yara sa impluwensiya sang makahulubog nga ilimnon ang mga biktima.
Sa subong, yara na ini sa purenarya ang ila nga bangkay.
Nagpanawagan man ang natungdan nga maghalong gid perme kag likawan ang magmaneho nga nakainom agud man nga malikawan ang mga aksidente sa dalanon.
